guppedu manasu

చెడ్డీలేసుకున్న రోజుల్లో..!!
'సిసింద్రీ'యే  పీఎస్‌ఎల్‌వీ రాకెట్‌

...........................................
దీపావళి.. అనగానే.. ఎన్నెన్ని జాడలు.. ఎన్నెన్ని 'ఉత్ప్రేరక' కసరత్తులు. దీపాల పండగ ఇంకా రాకముందే.. అంటే నెల, నెలాపదిహేనురోజులకు ముందే.. మనలో చాలామందిమి. నిక్కర్లుపైకి ఎగేసిమరీ.. ''పీఎస్‌ఎల్‌వీ'' ప్రయోగానికి సిద్ధమైపోయేవాళ్ళం.
పీఎస్‌ఎల్‌వీనా..?! అవును మరి.. సిసింద్రీని పిఎస్‌ఎల్‌వీ అనక మరేం అనాలి? ఎంతో కష్టపడి, చెట్టులు.. గుట్టలు ఎక్కి.. గొడ్లచావిళ్ళలోకి దూరి.. చాటుగా మాటుగా సూరేకారం నూరి.. ఎండలో ఎండబెట్టి.. బొగ్గు పౌడర్‌, గంథకం కలిపి.. దాంట్లో.. ఐదు.. ఒకటి, పది.. రెండు చెమ్చాల చొప్పున.. లెక్కలు కట్టి ''మందుగుండు ఫార్మూలా''ను సక్సెస్‌ఫుల్‌గా కలిపి.. సిసింద్రీ దట్టించినప్పుడు, కలిగిన ఆ ఆనందాన్ని వెనక్కి తీసుకురావడం ఎవరికైనా సాధ్యమా?! చెప్పండి.
సిసింద్రీ ఎగరాలంటే.. సిసింద్రీ గుల్ల కూడా బాగుండాలి. సినిమా వాల్‌పోస్టర్లు. దళసరి కాగితాలు ఎలాగోలా సంపాదించి.. నాలుగుపలకలుగా ముక్కలు చేసి.. వాటిని బుల్లి మిక్చర్‌ పొట్లం ఆకారంలో చుట్టి, అన్నం మెతుకులతో అట్టించినోడు అప్పుడు.. నిజంగానే హీరో కిందే లెక్క. ఇక ఆరిన గుల్లలోకి మందు గట్టిగా దట్టించి.. ఆరబెట్టిన సిసింద్రీలని అంటించి వదిలితే.. సర్రున గాల్లోకి ఎగిరితే.. నాకు మించిన మొనగాడు లేడనే.. ఫోజులు.. ఎక్కడికిపోతారు?!
నిక్కరు జేబులో పట్టినన్ని సిసింద్రీలు వేసుకుని.. తోటిపిల్లకాయలతో కలిసి. అగరొత్తు పుల్ల అంటించి.. మూతి దగ్గరకుపెట్టి ఊదుతూ, ఎంతో సాహసోపేతంగా.. సిసింద్రీలు అంటించడం.. ఒకరకంగా పీఎస్‌ఎల్‌వీ ప్రయోగంలాంటిదే.. నాలుగు మెలికలు తిరిగి ''జ్జప్‌..'' అంటూ సిసింద్రీ గంతులేస్తూ.. పాము ఆడినట్టు ఆడిందో.. రెండోక్లాసు, మూడోక్లాసు చదివే బుడ్డోళ్ళు నిక్కర్లు గట్టిగా పట్టుకుని.. అక్కడ్నుంచి పరుగే పరుగు.
అలా.. నిక్కర్లు వేసుకునే వయసులో.. దీపావళి వెలుగురవ్వ.. ఓ సిసింద్రీ అయ్యింది. బుడిబుడి పాపాయి చేతుల్లో చమ్కీలు చల్లిన ఓ తాడయ్యింది. హైస్కూల్‌ కుర్రాడి చేతిలో.. ధైర్యం విసిరిన రాకెట్టు మాదిరి.. ఆకాశానికి ఎగిరే తారాజువ్వ అయ్యింది.
ఇంకా.. అమ్మ, అక్క, చెల్లాయి చేతిలో విరిసిన మతాబుపూల వెలుగులు.. నాన్న పేల్చిన తాటాకు టపాసులు.. ఇరుగిల్లు పొరుగిల్లని లేకుండా అందరినీ కొండంత వెలుగులతో ఏకం చేసిన చిచ్చుబుడ్లూ.. ఇలా దీపావళి కాంతుల్లోకి తరచి చూస్తే గుక్కతిప్పుకోని అను భవాలు చాలానే ఉంటాయి. అందుకే.. ఈసారి వెలుగుల పండగ.. కొంచెం కొత్తగా.. ఇంకొంచెం అర్థవంతంగా.. మరికొంత ఆదర్శంగా జరుపుకుందాం!! మన చిన్నప్పటి జ్ఞాపకాలను నెమరువేసుకుంటూ..
-గంగాధర్ వీర్ల