.........
ఆ పూలతోటలో
రకరకాల పూలు
అనేకనేకాల పరిమళాలు
కానీ, వాటి గుండెల్లో
లెక్కకుమించి ఆలోచనలు
000
ఏ సిగలో వాలాలి?
ఏ దేవుడి మెడలో హారమవ్వాలి
ఏ శృంగారపు పందిరి నీడలో
మోహమై నలిగిపోవాలి?
ఏ.. ఉన్నాదపు ముంజేతిపై
బిక్కచచ్చిపోవాలి?
ఏ దోసిళ్ళలో ఇమిడి
నాలుగు అక్షరమాలలుగా
అల్లుకుపోవాలి?
000
ఆ పూలన్నీ..
తమ పూలవనాలను దాటుకుంటూ
ఒక్కొక్కటిగా
మొండితలకాయలవుతున్నాయి
000
పూలఅంగడిలో
అందంగా సింగారించుకుని
ఏ గూటికి చేరాలో తెలియక
వాడిపోని వదనంతో
గుసగుసలాడుకుంటున్నాయి
-గంగాధర్ వీర్ల
