guppedu manasu

అమ్మ చేతిలో పిల్లనగ్రోవి
..................................................
మా ఇంటి చూరు కింద కుంపటి..

పస్తుల పూటల్ని దాటుకుంటూ ..

ఇయ్యాల.. కాస్తంత రాజుకొంటుంది

ఒళ్ళంతా పేదరికాన్ని కప్పుకున్న

కట్టెలు కూడా కనికరంగా..

పెళపెళమంటున్నాయి.

000

కుంపటిపై కుండ కాగితే..

నాలుగు ముద్దలు ఉడుకుతాయి

ఆత్రంగా.. ఎదురుచూసే

ఆ బక్కచిక్కిన కడుపున..

ఆకలితీర్చే జావవుతాయి

అందుకేనేమో..పేగుల్ని బిగబెట్టుకని

అమ్మ కడుపులో పొగగొట్టం

ఆత్రంగా ఊదుతోంది

పొగబారిన కళ్ళకు

బిడ్డ ఆకలి స్పష్టంగా కనపడుతూనే ఉంది

ఇప్పడు పొగగొట్టం..

అమ్మచేతిలో ఆకలి తీర్చే పిల్లనగ్రోవి

ఆ..డొక్కల్లో గాలి ఎగదన్నుతోంది

కుండపై జావ పొంగుతోంది!!

-గంగాధర్ వీర్ల