guppedu manasu

వానా.. వానా
.............................
1
చల్లని స్పర్శమీటంగానే
మనసుకి రెక్కలొచ్చేశాయి
వీహాంగమై.. కరిమబ్బు మేఘమై
చినుకు.. చినుకూ వాలిన చోట
మొఖానవాలిన తడి చెమ్మనై
000

2
తాపమోడ్చిన నెరల్లో
ఆమాంతంగా వాలిన
నీ బిగికౌగిలి జలదరింపు
నానిన గుండెల్లో
పుడమి వాకిట ఏదో కవ్వింపు
000
3
తడిసిన శరీరాన్ని
అలాగే వదిలేయాలన్నంత ఆనందం
ఆకాశంవైపు చూస్తూ
ఇంకా ఇంకా తడిసి ముద్దయిపోవాలనే ఆరాటం
నేను భూమిని
కుంభవర్షంలా
రావోయ్.. నావళ్ళంతా చల్లగా చుట్టేసుకో
000
4
నిండువేసవి
చీల్చుకుని వానొచ్చే
వానతోపాటు వయ్యారమొచ్చే
చల్లని పలకరింతొచ్చే
పుడమి విచ్చుకున్న పలవరింత వచ్చే
వానా..వానా
నీతో నేను..
తుళ్ళింతల దివానా

-గంగాధర్ వీర్ల
ఈ వర్షం సాక్షిగా.. 19-06-2016