guppedu manasu

వానొచ్చింది.. కానీ..?!

............................

పగోడిలా ఉరుముతూ

శత్రువులా ఘీంకరిస్తూ..

పెళపెళమంటూ

పెద్దపెద్ద అంగలతో

కొండంతలు దాటి

కరిమబ్బుల్నిఎలాగోలా చీల్చుకుంటూ

పిడుగుపాటు గద్దింపుతో

వానొచ్చింది

000

ఊరు ఊరంతా హోరై

చెట్లు చేమలు కకావికలమై

ఫలానికొచ్చిన పంటను

నిలువునా కూలిపోయేలా చేస్తూ

పేదోడి గుడెసెల్ని పీకి పందిరేస్తూ..

మొత్తానికి వానొచ్చింది

000

చిత్తడి చినుకుల కోసం

నెర్రలు చాసిన భూమితల్లీ

కడుపారా తడవనేలేదు

చల్లని సాయంకోసం నోరుచాచి

ఎండిన ఆకులతో..

వాడి..రాలిపోతున్న

చెట్ల దాహమూ తీరలేదు

మొత్తానికి వానొచ్చింది

000

వొళ్ళంతా ముళ్ళకంచెలా

చుట్టేసుకున్న ఎండ గుబులుకు

ఇన్స్టంట్.. పెయిన్ రిలీఫ్

మందుపూతలా..

కాసింత చల్లదనం తాకగానే..

తనువులో కాసేపు మైమరపు

విద్యల్లత పెళపెళల సాక్షిగా

ఆకాశం నుంచి

బాల్కనీలోకి వాలి.. జారి

ఐస్ ముక్కలా రాలిపడ్డ

కాసిన్నిచిటపటలకు పిల్లల కేరింత

000

ఎట్టకేలకు

బడబడమంటూ

గుండెలదిరే శబ్దాలతో

వానొచ్చింది. కానీ

ఏంటో మనసుకి

తృప్తేలేదు!!

-గంగాధర్ వీర్ల