చెట్టు-పిట్ట
..........
మనం పుట్టి పెరిగిన ఊరు..
ఊరులా లేదు.
నిన్నామొన్నటి వరకూ..
గుండెలనిండా అమాయకత్వాన్ని నింపుకుని
మనందరినీ తల్లిలా ఆదరించిన
మన పల్లె ఏమాత్రం పచ్చగా లేదు.
000
చెట్టు చెట్టుగా లేదు....
పుట్ట పుట్టగాలేదు ....
చెట్టు కొమ్మపై వాలే పిట్ట జాడాలేదు..
గుండె బరువెక్కుతోంది
000
చెట్టుని బతికిద్దాం
చెట్టు బతికితే పిట్ట బతుకుతుంది
పిట్ట బతికితే మనమూ బతికినట్టే!!
-గంగాధర్ వీర్ల

యస్.. ఐ గాట్ ఇట్!!
1
తీరం వెంబడి
వెదుకులాట
ఒకొ్క్క అడుగుసాగుతూనే ఉంది
ఆశగా.. ఆత్రంగా
అడుగుపై అడుగు పడుతూనే ఉంది
ఒద్దికగా.. మరీ జాగ్రత్తగా..
నత్తగవ్వలు, ముత్యపు చిప్పలు
వజ్రంలా మెరిసే.. ఇసుకరాళ్ళు
కలగలిపి ఆమాంతంగా
దోసిళ్ళలోకి తీసుకున్నాగానీ
ఇంకా ఏదో ఉండాలి.
కచ్ఛితగంగా ఉండే ఉంటాయి
అందుకే కళ్ళు విప్పారి మరీ వెదుకుతున్నాయి.
2
ఎన్నెన్ని సాయంత్రాలు..
ఎన్నెన్ని తీరాలు..
ఆ పాదముద్రికల అన్వేషణ
అలా కొనసాగుతూనే ఉంది
ఇంకా కానరానిదేదో
దోబూచులాడుతోంది
కాదు.. కాదు..
యిక్కడే ఏదో ఒకమూలన ఉన్నట్టే ఉంది
అస్పష్టంగా.. అతి సమీపంగా
కనిపించనని మారం చేస్తున్నట్టే ఉంది
మరోపక్క అంతేజాలిగా
నేనున్నానంటూ నమ్మకం కలిగిస్తోంది
3
చెవిదిద్దో, కాలిపట్టానో
కాలికి తగిలినట్టే ఉంది
దోసిళ్ళలోకి మళ్లీ ఆత్రంగా
ఇసుక మీటిన సవ్వడి. కానీ..
దోసిళ్ళలో ఉప్పు నీళ్ళ పరిహాసం
4
చీకటిపడింది
పడిలేచే కెరటాల
హోరు
చెవిని తాకుతోంది
అప్పటిదాకా తెల్లగా పాలుగారిన సంద్రం
నల్లగా మిలమిల మెరవడానికి సిద్ధమవుతోంది
ఇంకా కానరానిదేదో మిగిలే ఉందక్కడ
బాగా పొద్దుకూకింది
తీరమంతా వెన్నెలీనుతోంది
అలసిన ఒక్కొక్క అడుగు
సేదతీరేందుకు సిద్దమవుతోంది
5
దూరంగా ఎక్కడి నుంచో..
పూలపరిమళపు ఆఘ్రానింపు
నులివెచ్చని కలవరింతలో
చల్లగా దరిచేరుతున్న జోలపాట
నను యెరిగిన గాలిసమీరంలా
తెల్లార్లూ ముచ్చట్లే
ఒంటరిగానేవున్నా. కానీ
జంటగా ఉన్న ఫీలింగ్
యస్..
ఐ గాట్ యు!
అండ్.. ఐ ఫీల్ యూ!!

- గంగాధర్ వీర్ల

పీచుమిఠాయండోయ్
పల్లవి:
తారంగం తారంగం
పీచుమిఠాయి తారంగం -2

చరణం:
తారంగం తారంగం
పుల్లకు చుట్టే తారంగం
నోట్లో కరిగే తారంగం
గొంతులో జారే తారంగం
తారంగం తారంగం
పీచుమిఠాయి తారంగం

చరణం:
నోటిలో కరిగెను తారంగం
పీచమణిగెను తారంగం
జీడికడ్డీ అయ్యెను తారంగం
కొరికితినేశాను తారంగం
తారంగం తారంగం
పీచుమిఠాయి తారంగం

చరణం:
నోరంతా తీపయ్యే తారంగం
మూతి గులాబిరంగయ్యే తారంగం
చెడ్డీ, గౌనుకి జిడ్డయ్యే తారంగం
వేళ్ళన్నీ చప్పరించేసాలే తారంగం

తారంగం తారంగం
పీచుమిఠాయి తారంగం-2

-గంగాధర్ వీర్ల, 21-05-2016

   

వానా.. వానా
.............................
1
చల్లని స్పర్శమీటంగానే
మనసుకి రెక్కలొచ్చేశాయి
వీహాంగమై.. కరిమబ్బు మేఘమై
చినుకు.. చినుకూ వాలిన చోట
మొఖానవాలిన తడి చెమ్మనై
000

2
తాపమోడ్చిన నెరల్లో
ఆమాంతంగా వాలిన
నీ బిగికౌగిలి జలదరింపు
నానిన గుండెల్లో
పుడమి వాకిట ఏదో కవ్వింపు
000
3
తడిసిన శరీరాన్ని
అలాగే వదిలేయాలన్నంత ఆనందం
ఆకాశంవైపు చూస్తూ
ఇంకా ఇంకా తడిసి ముద్దయిపోవాలనే ఆరాటం
నేను భూమిని
కుంభవర్షంలా
రావోయ్.. నావళ్ళంతా చల్లగా చుట్టేసుకో
000
4
నిండువేసవి
చీల్చుకుని వానొచ్చే
వానతోపాటు వయ్యారమొచ్చే
చల్లని పలకరింతొచ్చే
పుడమి విచ్చుకున్న పలవరింత వచ్చే
వానా..వానా
నీతో నేను..
తుళ్ళింతల దివానా

-గంగాధర్ వీర్ల
ఈ వర్షం సాక్షిగా.. 19-06-2016

 

డోంట్ బీ లైక్ దట్

ఎవరికోసం నిట్టూర్పు
దేహం రెండుగా చీల్చినట్టుందా!?
మేబీ.. ఉండొచ్చు
కాంక్ష వేరు.. ఆ కాంక్ష వేరు
రెండింటికీ మధ్య చాలా ఆగాధం ఉందేమో
000
నాలోకి అలా కఠినాత్మకంగా తొంగిచూస్తే
ఎర్రని రక్తకణాలతో నిండిన
దేహమే కనపడొచ్చు
ఇంకా వైవిధ్యంగా వెదుకు
కాసిన్ని ఆలోచనల్ని
సుతారంగా అదిమిపట్టి
నన్ను పట్టుకోడానికి
ప్రయత్నించు
ఏమో.. ఏదో ఒక రూపంలో దొరుకుతానేమో
000
ఇప్పటికీ దేహం..
రెండుగానే చీల్చినట్టుగానే ఉంది
ఒకటి అనుభవం
మరొకటి విధ్వేషం
మనిషి లోపలి పొరను పట్టుకోవడం
నీకెందుకు సాధ్యం కావడంలేదు
000
ఇప్పటికీ నా దేహం
రెండుగా చీలినట్టుగానే ఉంది
కాదు.. కాదు..
అనవసరపు వెదుకులాటలో
నా దేహాన్ని
ఎవరో కావాలనే చీల్చినట్టుగా ఉంది
హేయ్.. డోంట్ బీ లైక్ దట్!!
-గంగాధర్ వీర్ల, 17-05-20016

నో.. ‘కలర్’ కరెక్షన్

నో.. ‘కలర్’ కరెక్షన్
....................................
#HappyHoli

1.
లంకపొలంలో శీనుగాడు
గుర్రమెక్కాడు..
అది గుర్రం కాదు.. కర్రి ఎద్దు
శీనుగాడూ నలుపే..
ఎద్దూ నలుపే
అందుకే కర్రెద్దు వాడికి గుర్రమయ్యింది
గుర్రానికేమో వాడు రాజయ్యాడు
లంకంత పొలానికి గోపబాలుడే వాడు

2.
బడికెళ్ళే మొఖానికంతా
అమ్మ రాసిన పౌడరంట
నున్నా నున్నాని నూనె జుట్డుకు నూనె పాపిడంట
మొఖమంతా తెల్లగా మెరవాలని
బడికెళ్ళే మొఖానికంతా.. అమ్మరాసిన పౌడరంట
తెలతెల్లాని చిన్నోడు అందం చూసి
తెల్లాని చందమామ.. చిన్నబోదామరి

3.
పంతులారాబ్బాయి
బహు తెల్లగున్నాడంట
బడిలో.. గుడిలో భలే భలే మాట్లాడతాడంట
నుదిటిమీద ఎర్రని తిలకమంట
తెల్లని పంచెకట్టు వేషమంట

4.
సలీంగాడు..
ఏదడిగినా క్యాజీ.. క్యారే అంటాడు
రంజాన్ నాడు ఆవోభాయ్ అంటాడు
మా ఇంటిల్లిపాదికి ప్రేమగా సేమ్యా తేస్తాడు
చందమామలాంటోడు
రామ్.. రామ్ అంటూ
ఒకటే మాయ చేస్తాడు

5.
శీనుగాడు కర్రోడు
పంతులారబ్బాయి తెల్లోడు
సలీంగాడు పసుపుఛాయగలోడు
నేనేమో చామన ఛాయోడ్ని
మా రంగులు కలిశాయి
ఆప్యాయతలు రంగరించాయి
నో.. ‘కలర్’ కరెక్షన్

-గంగాధర్ వీర్ల
-22-03-16

Feel My Illusion 

నింగిలో..
ఏదో ఒక రాత్రి
జాగారం చేయాలని ఉంది
నక్షత్రాలతో చేయీ చేయీ కలపాలని ఉంది
ఉల్లిపొరలాంటి చల్లని మేఘంపై
కాసేపు ఉయ్యాలూగాలని ఉంది
ఆనక..
చందమామా రావే..
జాబిల్లి రావే.. అని

అమ్మ నేర్పిన పాటను..
ఆ జాబిలమ్మకే వినిపించాలని ఉంది
........
ఏదో ఒక రాత్రి
జాగారం చేయాలని ఉంది
నాలో నేను మాట్లాడుకోవాలి
ఆనక.. అలసిపోయి
కునుకుతీయాలి
రాత్రి జాగరపు సంగతుల్ని
పగలంతా నెమరు వేసుకోవాలి
Feel my Illusion ...!!

Gangadhar/World poetry day/21-03-2016