guppedu manasu

నో.. ‘కలర్’ కరెక్షన్

నో.. ‘కలర్’ కరెక్షన్
....................................
#HappyHoli

1.
లంకపొలంలో శీనుగాడు
గుర్రమెక్కాడు..
అది గుర్రం కాదు.. కర్రి ఎద్దు
శీనుగాడూ నలుపే..
ఎద్దూ నలుపే
అందుకే కర్రెద్దు వాడికి గుర్రమయ్యింది
గుర్రానికేమో వాడు రాజయ్యాడు
లంకంత పొలానికి గోపబాలుడే వాడు

2.
బడికెళ్ళే మొఖానికంతా
అమ్మ రాసిన పౌడరంట
నున్నా నున్నాని నూనె జుట్డుకు నూనె పాపిడంట
మొఖమంతా తెల్లగా మెరవాలని
బడికెళ్ళే మొఖానికంతా.. అమ్మరాసిన పౌడరంట
తెలతెల్లాని చిన్నోడు అందం చూసి
తెల్లాని చందమామ.. చిన్నబోదామరి

3.
పంతులారాబ్బాయి
బహు తెల్లగున్నాడంట
బడిలో.. గుడిలో భలే భలే మాట్లాడతాడంట
నుదిటిమీద ఎర్రని తిలకమంట
తెల్లని పంచెకట్టు వేషమంట

4.
సలీంగాడు..
ఏదడిగినా క్యాజీ.. క్యారే అంటాడు
రంజాన్ నాడు ఆవోభాయ్ అంటాడు
మా ఇంటిల్లిపాదికి ప్రేమగా సేమ్యా తేస్తాడు
చందమామలాంటోడు
రామ్.. రామ్ అంటూ
ఒకటే మాయ చేస్తాడు

5.
శీనుగాడు కర్రోడు
పంతులారబ్బాయి తెల్లోడు
సలీంగాడు పసుపుఛాయగలోడు
నేనేమో చామన ఛాయోడ్ని
మా రంగులు కలిశాయి
ఆప్యాయతలు రంగరించాయి
నో.. ‘కలర్’ కరెక్షన్

-గంగాధర్ వీర్ల
-22-03-16